LOADING

italia

Ромул, Рэм і кураня па-паляўнічы

Вітаю. Тут Дзмітранок. Я распавяду вам адну гісторыю і падзялюся адным кулінарным рэцэптам. Дзейнічаць буду па прынцыпе шэфа Агюста Густо: «гатаваць можа кожны». Галоўнае, любіць працэс і ўсё атрымаецца. Мыю рукі, запальваю печ.

Гісторыя

Легенда сцвярджае, што Рым заснавалі Ромул і Рэм, але потым брат забіў брата. Археолагі нават знайшлі грабніцу Ромула, што нібыта легенду спраўджвае. А як жа ваўчыца? Была, але пра яе іншым разам. Пакуль пра братоў. Заснаваўшы горад, ім і іх эга хутка стала цесна ў Рыме — мусіў застацца нехта адзін. Браты вырашылі: каму богі пашлюць большы знак у выглядзе птушак, той будзе і правіць. Ромул уладкаваўся на Палаціне, галоўным рымскім пагорку; Рэм — на Авенціне. Але браты не дамовіліся пра крытэр перамогі. Так на Авенціне птушкі з’явіліся раней, але ў Ромула іх было ўдвая больш. У выніку чаго кожны палічыў сябе пераможцам і ў сварцы Ромул забіў брата. Гэта легенда, а птушка тут реферэнсам да рэцэпту.

Рэцэпт “Pollo сacciatora”

Спатрэбіцца:
— кураня 1,5 кг.
— 2 морквы
— 2 сцябла сельдэрэю
— 1 вялікая цыбуля
— 3 зубчыка часнаку
— 1 стручок вострага перцу
— 3 ліста шалфеі
— 1 галінка размарыну
— 150 г. маслін з косткамі
— 500 г. ачышчаных памідораў ва ўласным соку
— 25 г. каперсаў
— 200 г. белага віна
— 1 л. булёна з гародніны
— аліўкавы алей
— соль

Спачатку рыхтуюся. Кураня разразаю на порцыённыя кавалкі. Здымаю скуру, хаця шмат хто з кухараў не здымае, але ўсё ж скурку прэч. Гародніну наразаю кубікамі і хаваю ад дзяцей, што там ёсць сельдзерэй. Ім потым будзе смачна, але факт наяўнасці гэтай гародніны іх заўсёды бянтэжыць. Час гатаваць.

1. У рондалі на аліўкавым алеі пасерую часнок і потым яго выкідаю, бо ён патрэбны выключна, каб алеі атрымаў водар. Далей дадаю востры перац, чабор шалфей, размарын з той жа мэтай, як і іх папярэднік. Смак — галоўнае ў страве, а не яе колькасць.
2. У тым жа рондалі пасерую гародніну да мяккасці прыкладна 20 хв.
3. Паралельна да залатага колеру абсмажваю кавалачкі мяса.
4. Перакладаю кураня ў рондаль да гародніны і дадаю сухое віно. Віно ўзмацняе водар страў за кошт вызвалення эфіраў фруктовых кіслот і падкрэслівае натуральны смак гародніны.
5. Калі віно выпарыцца, дадаю таматы і заліваю булён так, каб ён усе закрываў. Толькі не перабольшвайце, бо атрымаецца суп.
6. Наліваю сабе каньяка і чакаю прыкладна 1 гадзіну з капейкамі, назіраючы, як страва тушыцца.
7. За 15 хв да гатоўнасці дадаю масліны, каперсы і соль.
8. Як прыгатуецца, пачакайце хвілін гэтак з 10 і смачна есці.